1.2-M residente sa Soccsksargen region, giawhag nga magpabakuna

GIAWHAG sa Department of Health (DOH) sa Soccsksargen ang 1.2 milyon katao nga wala pa nabakunahan batok COVID-19 sa pag-take- advantage sa nagpadayong nationwide vaccination campaign nga hangtud pa sa Desyembre 1.

Matud ni Dr. Sulpicio Henry Legaspi, DOH-12 assistant director nga gatusan ka mga vaccination sites ang giablihan nila. Kauban ang lokal nga panggamhanan ug mga pribadong sektor aron mahimong sayon sa mga residente sa pagpabakuna.

Gisiguro sa opisyal nga paigo ang supplies sa bakuna aron ibakuna sa mga residente lakip ang mga minor de edad. Sa 311, 894 daily target nga indibidwal nga bakunahan, 98,848 niini ang sa North Cotabato, samtang 60,695 sa South Cotabato, 54,308 usab ang sa Sultan Kudarat. Samtang 44, 828 ang Sarangani Province, 35,089 ang sa General Santos City ug `8,126 sa Cotabato City. As of November 29, anaa sa 1,331,284 ang partially vaccinated samtang anaa pa lang sa 946, 322 ang fully vaccinated, base sa rekord sa DOH-12.

Sulod sa pipila ka semana nga pagbakuna batok sa virus wala pa naabot sa rehiyon ang 70% herd immunity. Pipila usab sa lugar nga nakatala og labing taas nga vaccination coverage mao ang GenSan nga dunay 37.45% fully vaccinated. Sunod ang Cotabato City nga dunay 31.89% katao ang nakakuha na og duha ka dose sa bakuna, 29.42% ang South Cotabato, 28.07% Sultan Kudarat,24.40% North Cotabato samtang 14.93% sa Sarangani. Natala usab sa GenSan, 1,229 katao nga nakaangkon na og booster shots, 401 sa North Cotabato, 121 sa Sarangani, 27 sa South Cotabato ug 13 sa Cotabato City.

Usa ang Soccsksargen sa unom ka rehiyon sa nasud nga gitutukan sa national government sa vaccination rollout. Sa unang adlaw sa national vaccination, nakakuha og 48% turnout ang nasud base sa rekord nga gisumite sa mga LGU’s sa DOH. (Richel Gubalani)

Leave a Reply

Your email address will not be published. Required fields are marked *