1 ka baligyaan sang karne sa TATC, ginkawatan!

Nagpabalhag sa Roxas City PNP ang isa ka negosyante matapos ang natabo nga pagpangawat sa iya nga pwesto sa sulod sang Teodoro Arcenas Trade Center (TATC) Brgy. VIII, Roxas City.

Ginkilala ang biktima kay Vicenta Ragasa, 47-anyos, residente sang Brgy. Mongpong, samtang ang ginatudlo suspek amo sanday Roan Diaz kag Steve Cargando, 35-anyos kag residente sang Brgy. Lonoy, sining syudad.

Sandig sa Roxas City PNP, nagpadulong sa ila istasyon si Ragasa kag ginapahayag nga nadulaan ini sang P9,200 nga balor sa kwarta.

Suno sa biktima, sang tinalikdan nga adlaw sang Martes, Mayo 31 ginbilin niya sa iya pwesto ang iya arinola nga ginasudlan sang benta bangud nagasalig siya nga may yara sang security guard ang TATC.

Apang, sang nagbukas ini sang pwesto sang Huwebes, Hunyo 1, nadiparahan sini nga wala na sang unod ang iya arinola nga ginabutangan sang coins.

Sa pagtsekyar sa CCTV, nakita ang duha ka guwardiya nga may dala nga flashlight nga nagpadulong sa pwesto sang negosyante kag didto natigayon nga makuha ang benta.

Sa interview sang Brigada News FM kay Ragasa, ginpahayag sini nga indi siya magpasaka sang kaso batuk sa duha ka suspek bangud indi man ini luyag nga madulaan sang trabaho, basta ibalik lang nila ang kwarta nga ila ginkuha kay ini ang ginabayad niya sa iya mga bills. 

Dugang pa sini, nagkontak naman sa iya ang isa sa mga suspek nga nagpahayag nga ila pangitaan sang paagi nga mabalik ang kwarta.

Sa karon, ginpalab-ot na sa kay Mayor Ronnie Dadivas ang natabo kag natalana nga i-terminate ang duha sa security guard. | Judy Ann Juare