Gipaubos na sa otopsiya ang patay’ng lawas sa 10-anyos nga batang babaye nga nabuthan sa usa ka eksplosibong butang sulod sa ilang panimalay sa Purok 3 Ampianga, lungsod sa Sugbongcogon, Misamis Oriental.
Sa pakighinabi sa Brigada News FM, gibutyag ni Sugbongcogon Municipal Police Station Chief Investigator Police Staff Sergeant Randolf Sabuero nga naghulat sila karon sa resulta sa imbestigasyon sa Scene of the Crime Operatives sa Crime Laboratory sa Misamis Oriental Provincial Forensic Unit nga nakabasi sa Gingoog City.
Ingon man ang Post Blast Investigation sa Explosive Ordnance Disposal.
Una nang migawas sa imbestigasyon nga gikan sa eskwelahan ang bata, ug mihapit sa silingan aron i-uli ang icebucket tungod gikan sab kini namaligya og ice candy, ug sa pag-uli niini sa ilang balay naglung-ag kini dihang kalit lang dunay mibusikad nga eksplosibo.
Giklaro sab sa kapolisan nga atol sa paglung-ag sa bata, walay presensya sa LPG.
Sa blast site, nasuta nga tottally damage ang lawas sa bata.
Nasayran nga atol sa panghitabo, nag-inusara pa lamang ang bata sa panimalay tungod ang ginikanan niini nanarbaho pa, kung asa ang amahan niini usa ka panday ug nag-sideline isip habal-habal driver samtang ang inahan niini, nagbantay og laing bata.
Sa karon, anaa pa sa Gomez Funeral Home sa lungsod sa Talisayan ang patay’ng lawas ug kasamtangan nga gipa-ilawom sa otopsiya diin dunay mga fragment sa lawas sa bata.