12 ka indibidwal sa Barangay Binaobawan, Pilar ang nabalhag nga apektado sang Paralytic Shellfish Poisoning (PSP) matapos nakakaon sang tahong ukon green shells.
Ini ang ginkumpirma ni Punong Barangay Marilyn Belalo sang ma-interview sang Brigada News FM Roxas City.
Suno kay Belalo, ang 12 ka indibidwal nga nahilo ang nagikan sa tatlo ka sitio kun sa diin 7 ang biktima sa Sitio Kawit, 1 sa Sitio Ilaya kag 4 sa Sitio Proper.
Ginkasubo man sang Kapitan nga isa gid ka pamilya sa Sitio Kawit ang naapektuhan matapos nagsud-an sang tahong kag lunsay nagbatyag sang pagpalanakit sang tiyan, paglingin sang ulo kag pagpalanuka kun sa diin ginbawian gid sang kabuhi ang 9 katuig nga bata nga lalaki bangud wala gilayon madala sa ospital.
Dugang pa sini nga wala nagpahibalo ang magpamilya sa ila mga kasilingan ukon sa barangay nga nagalain na ang ila pamatyag.
Nahibaluan nga malayo pa ang nasambit nga sitio bangud kinahanglan pa nga magsakay sa baruto antes makaabot sa ila nga barangay.
Ginpahayag man ni Belalo nga sa ospital na niya nahibaluan nga madamo na sang naapektuhan sang Paralytic Shellfish Poisoning nagikan sa iban pa nga barangay bangud man nga nagkaon sang panginhason.
Sa karon, nagapanawagan ini sa iya mga pumuluyo nga likawan anay ang pagkuha, pagkaon kag pagbaligya sang anuman nga sahi sang panginhason agud indi na madugangan pa ang mabiktima sang PSP. | Judy Ann Juare