Mainit nga ginbaton sang Capiz State University ang 12 ka mga estudyante gikan sa Indonesia nga ika-9th Batch para sa SEA-Teacher Student Exchange Program nga maga-practicum sa 9 ka mga Campuses sang nasambit nga unibersidad sa probinsya sang Capiz.
Ginpangunahan ni Dr. Editha C. Alfon, SUC President III ang amo nga kahiwatan kag nagpalab-ot man sang mensahe sa mga 12 SEA-Teacher Student interns.
“We admire your courage in seeking out knowledge, learning new cultures, and absorbing best practices in education which you may use to enhance your skills in your future profession. Your dedication to becoming world class educator is truly remarkable!” pahayag ni Dr. Alfon.
Naghatag man sang mensahe sanday Vice Governor James Mitang Magbanua bilang representante ni Governor Fredenil Castro kag Ms. Cheryl Anne del Rosario, Director sang Panublion Museum nga nagpresentar man kay Mayor Ronnie T. Dadivas.
Magadugay sang isa ka bulan ang On-the-Job Training sang 12 ka mga estudyante kag magluwas sina pagatun-an man nila ang aton kultura kag tradisyon.
Nahibaluan nga magapadala man sang 4 ka estudyante ang CAPSU agud man nga mag-OJT sa Indonesia sa maabot nga Setyembre 25, 2023. | Judy Ann Juare