Mokabat sa 139 ka nagkadaiyang matang sa armas nga gipanag-iyahan sa rebeldeng New People’s Army kon NPA ang gipangguba sa 10th Infantry Division (ID) sa Philippine Army atol sa demilitarization rites sulod sa headquarters sa Davao de Oro sa miaging Biyernes.
Sumala kang Major Jerry Lamosao, ang 10th ID Public Affairs Office chief, ang maong mga armas gilangkuban sa 113 ka high-powered firearms (HPFA) ug 26 ka low-powered firearms (LFPA).
Sigon usab ni Major General Ernesto Torres Jr., 10th ID commander, matag armas sa mga rebelde nga naimbargo sa kasundaluhan dunay kaugalingong mga storya sama sa kalisud, kaisog ug uban pa nga gibubo sa mga sundalo aron maundang ang kahadlok nga hatud niini sa matag katawhan.
Dugang sa opisyal ang pagguba sa mga Confiscated, Captured, Surrendered ug Recovered’ firearms usa ka pamaagi aron pahinumduman ang publiko nga dili na subling magpalingla sa walhong pakigbisog.
