Nagadangat sa 18 ka mga personnel sang Provincial Disaster Management Program Division sang Negros Occidental ang ginpapanaugan sang ‘show cause order’ sang talatapan ni Provincial Legal Officer Atty. Alberto Nellas, Jr. agud igapaathag ang indi nila pagsumiter sa gintalana nga panahon sang ‘trip tickets’ kag sa ila sini nga pinamatasan nga ginapakita sa pila ka mga kaupod nila sa trabaho.
Ang mga ginapangayuan sang sabat nga mga PDMPD personnel ginalakipan sang 13 ka mga drivers, 1 ka special operations officer, 1 ka utility worker kag 3 ka mga administrative aide.
Ginpahayag ni Provincial Legal Officer Atty. Alberto Nellas, Jr. ang nasambit nga panibag-o nga show cause order ukon tikang ginhimo sang iya nga talatapan ang may kaangtanan sa ginaduso kag handom sang gobyerno probinsyal nga mapaayo ang paghatag sang serbisyo kag ang salabton nga responsibilidad sang tagsa ka mga empleyado sang kapitolyo probinsyal.
Suno kay Nellas ang nasambit nga show cause order ang nabaton na sang nasambit nga mga personnel mga duha na ka semana ang nakaligad kag ang mga ini ang nakasumiter na sang tagsa nila ka mga sabat.
Ginatun-an sa karon sang legal office ang mga ginpresentar nga mga ebidensya agud mahibaluan kun bala ang mga ini ang papanaugan sang ‘formal charge’ ukon indi sa kaso nga ‘administrative offenses’.
Sa isyu natuhoy sa ‘trip tickets’ ginpaalinton ni Nellas nga ulihi ang pagsumiter sang mga drivers sang ila sini mga tickets nga nagalambot kun kaisa sa isa ka bulan kun sa diin isa ka dako nga irregularidad sa ila sini mga pagpatigayon sang pagbiyahe.
Magluwas sa trip tickets, nakabaton man sang reklamo ang provincial legal office natuhoy sa ‘unruly behavior’ sang pila ka admin personnel sang PDMP, Iban sa mga ini ang wala nagatrabaho sang insakto samtang ang iban ang nagahimo sang pagpamahog sa ila sini mga kaupdanan sa diin para kay Atty. Nellas kinahanglan nga papanaugan sang nagakaigo nga disciplinary action.