Dakop ang duha ka grupo sang mga tripulante matapos naaktuhan nga nagapatigayon sang iligal nga pagpangisda sa kalalawran nga sakop sang Panay.
Ginkilala ang una nga grupo nga sanday Rodel Boncayo, 34-anyos (Boat Captain); kaupod ang iya mga crew: Janlee Tamayo, 30-anyos kag Gary Bales, 46-anyos lunsay mga residente sang Brgy. Barancalan, Carles, Iloilo City.
Samtang ang ikaduwa nga grupo naman amo sanday Argie Fuentes, 28-anyos (Boat Captain) kaupod ang iya mga crew: Renante Talapar, 45-anyos kag Edward Orlas, 21-anyos nga lusay residente naman sang Brgy. Tabugon, Carles, Iloilo City.
Sandig sa Panay Municipal Police Station, naaktuhan nga nagapatigayon sang iligal nga pagpangisda ang grupo ni Boncayo takna alas 6:40 sang aga samtang ang grupo ni Fuentes alas 7:20 sang aga kahapon nga adlaw sang Martes, Mayo 16.
Narekober sa grupo ni Boncayo ang isa ka unit sang steel boat nga may (1) unit 20HP and 14 HP Diesel engine, fishing net with complete accessories kag mas o menus lima ka kilo nga nagkalain-lain nga sahi sang isda.
Nakumpiskar naman sa grupo ni Fuentes ang (1) unit pump boat nga may (1) unit 4DR5 HP Diesel engine, fishing net with complete accessories kag mas o menus lima ka kilo man nga nagkalain-lain nga sahi sang isda.
Magapangatubang ang mga ini sang penalidad nga paglapas sa Municipal ordinance No. 03-02 series of 2003.
Sa karon, yara na sa kustodiya sang MENRO Panay ang mga nagkaladakpan lakip na ang mga nakumpiskar sa ila nga mga kagamitan para sa nagakaigo nga disposisyon. | Judy Ann Juare