Dakop ang duha ka High Value Individual sa ginkasa nga drug buy-bust operation sang gintingub nga pwersa sang Capiz-PPDEU kag cluster SDET nga ginabug-usan sang Mambusao, Sigma kag Sapian MPS sa Brgy. Bula, Mambusao, Capiz takna alas 11:15 kagab-i sang Miyerkules, Agosto 23.
Ginkilala ang mga nadakpan nga sanday Marvin Alejaga, 38-anyos, negosyante kag residente sang Brgy. Poblacion Tabuc sa nasambit nga banwa kag Athaniel Delfin, 18-anyos, residente sang Brgy. Pinamalatican, Sigma.
Sandig sa impormasyon nagikan sa Mambusao Municipal Police Station, nabaklan sang isa ka police poseur buyer sanday Alejaga kag Delfin sang 1 plastic sachet sang suspected shabu nga nagabalor sang P6,500.
Narekober pa gid sa posisyon kag paghinakop ni Alejaga ang 14 ka sachets sang suspected shabu, coin purse kag isa ka motorsiklo.
Ginabanta nagabug-at tanan sang 70 gramos ang mga nakumpiskar nga iligal nga droga kag may standard drug price nga P476,000.
Magapangatubang sang kaso nga paglapas sa RA 9165 ukon Comprehensive Dangerous Drugs Act of 2002 ang mga nadakpan.
Sa karon, nagapabilin ang mga ini sa kustodiya sang Mambusao PNP para sa nagakaigo nga disposisyon. | Judy Ann Juare