Nagtingkagol karon ang duha ka lalaki human sa gipahiyagon nga drug buy-bust operation sa mga kapulisan sa Ormoc City Police Office kon OCPO kagahapon sa hapon, Huwebes, Pebrero 23, 2023, didto sa usa ka Travelers Inn nga nahimutang sa dan J. Navarro niining dakbayan.
Sa impormasyon nga nakuha sa Brigada News FM Ormoc gikan sa OCPS 1, nahibaw-an nga sa hiniusa nga operasyon sa PDEA R8, OCPS 1, OCPS 4, OCPO-CIU, OCMFC, UG PDEG, nasikop sa sud sa Room 208 sila si Virchi Diximo alyas ‘Damvi’, 35-anyos, residente sa Purok 7, Brgy. Can-adieng niining dakbayan, ug lain pang suspetsado sa pagpayuhot og iligal nga drugas nga si Marco Marquez, 20-anyos, ug residente sa Purok 5, Brgy. Naungan niining dakbayan.
Ang pagdawat sa nagpakaaron-ingnon nga buyer sa selyado nga plastic sachet sa gituohang shabu diin mitimbang og 0.04 gramo ug mibalor og Php 1,000, maoy timailhan sa pagsikop sa mga suspetsado.
Nakuha gikan sa mga dinakpang ang lain pang 3 ka selyado nga plastic sachet sa gituohang shabu diin mitimbang daw kini og kapin kon kuwang 2.04 gramo, ug uban pang mga ebidensiya ug drug paraphernalia.
Samtang, sa pagsuwat niining balita, gi-andam na sa mga otoridad ang tukmang kaso batok sa mga dinakpan.