Gikatakdang duha ka mga opisyal sa kapulisan nga sakop sa Police Regional Office (PRO-7) ang motambong sa Senate hearing human pasanginli sa mga resource person nga giingong adunay nahimong iregularidad sa serbisyo.
Ang maong mga opisyal mao sila si Police Colonel Arnel Banzon, kanhi direktor sa Lapu-Lapu City Police (LCPO) ug si Police Colonel Rommel Ochave, hepe sa Cebu Police Provincial Office (CPPO).
Nasayran nga si Banzon nahimong hepe sa Negros Oriental Police Provincial Office (NOPPO) niadtong Mayo 27, 2020 hangtod sa Oktubre 3, 2020 samtang si Ochave nahimong hepe sa maong rehiyon sa Criminal Investigation and Detection Group (CIDG) Regional Field Unit-7.
Hinoon giklaro ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, direktor sa PRO 7, nga ang paghingan nila ni Banzon ug Ochave sa hearing sa Senado walay kalabotan sa kamatayon ni Governor Degamo.
Apan gimandoan gihapon sa PRO-7 ang duha ka mga police official sa pag coordinate sa Senado.//