GIKABALAKA na sa health officer sa munisipalidad sa Alabel, Sarangani Province ang pagkatala og duha ka kaso sa “dengue death”. Kini dungan sa kampanya sa probinsiya nga makab-ot ang “zero dengue death”.
Giangkon usab ni Dr. Honorato Fabio, Municipal Health Officer nga karong semanaha nag-una ang Alabel sa nakatala og labing taas nga kaso sa dengue sa tibuok Sarangani. Luyo niini, giangkon ni Fabio nga gipakusgan na nila ang ‘awareness’ sa publiko aron mabatukan ang dengue.
Giawhag nila ang mga residente nga batasanon ang pagpanglimpyo sa palibot aron malikayang mabalayan sa lamok nga nagdala og dengue. Samtang sa pamahayag ni Arjohn Gangoso, tigpamaba sa Department of Health (DOH) 12 nga nakigtambayayong na sila sa mga Rural Health Unit (RHU) aron makonhuran ang pagkatala sa kaso dengue. I Richel Gubalani