2 padi sa Albay, nagpositibo sa COVID-19, simbahan asin opisina kaini naka lockdown

BICOL—Naka lockdown ngunyan an simbahan kan Our Lady of the Gate Parish Daraga asin St. Lawrence Martyr Parish, Tiwi kabali an rectory asin opisina kan mga ini makalihis na magpsotibo sa COVID-19 an duwang padi.

Sa abiso kan Diocesan COVID-19 Committee kan Diocese of Legazpi, ipinaaram kaini na nagpositibo sa RT-PCR test sinda Rev. Fr. Eulogio Lawenko, pastor kan Our Lady of the Gate Parish asin Rev. Fr. Romeo Realingo, Parochial Vicar kan   St. Lawrence Martyr Parish.

Positibo man sa antigen test si Rev. Fr. Josefino Templado, priest-in-residence kan Our Lady of the Gate Parish, Daraga kun kaya nakatalaan ining isalang sa RT-PCR test.

Pasalamat man an Diyosesis huli ta saro pa sa mga ini an nagnegatibo sa parehong antigen asin RT-PCR test na iyu si Rev Fr. Jose Chavenia Jr., pastor kan St. Lawrence Martyr Church sa banwaan nin Tiwi. Ini sa ibong kan pagkaopsital kan nasabing padi nin pirang aldaw huli kan flulike symptoms. Masairarom man liwat ini sa 7-days quarantine dawa nadischarge na sa ospital.

Si Father Lawenko naka confine ngunyan sa ospital asin nagsasairarom sa treatment, si Fr. Realingo naman nakaluwas na sa ospital asin presenteng naka home quarantine mantang si Fr. Templado naman naka home quarantine asin nagtetenir na asymptomatic.

Sigun sa Diyosesis, an pagsapubliko ninda kan mga impormasyon na ini igwa nin maninigong permiso sa mga clergy asin igwa man nin close coordination sa mga local health authorities ngani makatabang sa marikas na contact tracing, early detection asin reporting asin ngani na ingganyaron man an gabos na dayupot na sunudon an mga health protocol ngani makalikay sa COVID-19.###