2 patay sa pagpamusil sa riding in tandem sa Gensan

PATAY ang duha katao human sa labing ulahing insidente sa pagpamusil sa General Santos City, alas-5:20 sa hapon sa Marcos Highway, Barangay Apopong.

Giila ang mga gipatay nga silang Agustin Gonzales, taga Barangay Lagao ug Romanito Evangelista, hamtong ang panuigon. Ang duha ang pulos nakaangkon og samad sa ulo ug lawas silang Gonzales ug Evangelista.

Sa gihitaboan sa krimen, narekober ang 17 ka bala sa M16 ug kalibre .45 nga pusil, duna pito ka bala nga wala kabuto.

Matud ni Police Major Dennis Yuson, sakay ang duha sa motorsiklo nga ‘red plate’ asa nakabutang ang pulong nga ‘for official use only’. Gikan sa Lanton, City Jail ang duha human gisugat ni Gonzales si Evangelista nga bag-ong gawas sa presohan.

Posibleng gisundan ang duha gikan sa City Jail sa mga armadong tawo nga sakay sa duha ka motorsiklo nga Bajaj ug XRM. Si Evangelista ang dunay kasong robbery with homicide ug iligal nga droga samtang giberipika pa ang impormasyon kung duna kini kaso nga duna usab kalabutan sa gidiling droga, dugang ni Yuson. Dili pa usab makumpirma ni Yuson nga si Gonzales ang empelyado sa LGU sa GenSan.

Kasamtangan, nagpadayon ang imbestigasyon sa kapulisan kalabut sa hitabo samtang gitigum ang mga CCTV sa lugar asa nahitabo ang pagpamusil. I Richel Gubalani