Pilason ang duha ka lalaki sa natabo nga pagpangluthang sa Sitio Pinanubol, Brgy. Poblacion Norte, Ivisan, Capiz takna ala 1:40 kahapon sang Dominggo, Setyembre 10.
Ginkilala ang napilasan nga sanday Albert de Jose, isa ka mamumugon, residente sang nasambit nga lugar kag Jefrey Ibañez Daradar, yara sa legal nga pang-edaron, residente sang Maasin, Iloilo.
Sandig sa imbestigasyon sang Ivisan Municipal Police Station, samtang nagalakat si Albert kaupod ang iya abyan nga si Joel dela Vega sa may bahin sang peryahan, aksidente nila nga nabungguan ang isa sa duha ka mga wala makilala nga suspetsado.
Ginapahayag nga sang nagpauli na sanday Albert kag Joel ginsundan ang mga ini sang duha ka suspetsado.
Bangud sini, nagkuha sang talibong si Albert sa sulod sang iya boarding house kag tuyo nga kompruntahon ang duha ka tawo nga nagasunod sa ila, apang madasig nga nagbunot sang armas-luthang ang isa ka suspek kag ginluthang sang makapila ka beses si Albert kun sa diin naigo ini sa natuo nga tiyan kag sa nawala nga kilikili.
Samtang, nag-angkon naman sang igo sang bala sa likod nga porsyon sang iya lawas si Jefrey nga naglabay lamang sa lugar.
Madasig naman nga nakapalagyo ang mga suspek matapos ang nakumiter nga krimen.
Narekober sa lugar ang lima ka basiyo sang 45 caliber nga armas-luthang kag 2 ka talibong nga nagalaba sang 23 pulgada kag 22.5 pulgada.
Sa karon, padayon pa ang imbestigasyon kag hot pursuit operation sang mga kapulisan agud matumod ang pagkakilanlan sang mga suspetsado. | Judy Ann Juare