Pilason ang duha ka persona matapos ang nagluntad nga aksidente sa Barangay Ilaya, Ivisan, Capiz.
Ginkilala ang mga napilasan nga sanday Joseph Basamot, driver sang Rusi nga motorsiklo kag Nathaniel Fuentes Jr. 46-anyos, isa ka security guard, driver sang TMX 125 nga motorsiklo kag residente sang Sta. Cruz sang nasambit nga banwa.
Sandig sa imbestigasyon sang Ivisan MPS, samtang ginamaneho ni Basamot ang iya motorsiklo kag magaliko kuntani sa Sitio Pinamasawan hinali nalang ini nga nabungguan ni Fuentes matapos nag-overtake.
Bangud sa natabo, nag-angkon sang minor nga pilas sa tiil si Basamot kag nagpamalibad nga magpadangat sa ospital.
Samtang si Fuentes naman ang nag-angkon sang pilas sa iya liog kag magkatuhay nga parte sang lawas.
Madasig naman ini nga ginrespondihan sang katapo sang Municipal Disaster Risk Reduction and Management Office (MDRRMO) kag Arriba Ivisan Response Unit (AIRU) para sa pauna nga pagbulong antes ginpadangat sa ospital.
Sa karun, yara sa kostudiya sang Ivisan PNP ang mga motorsiklo para sa nagaka-igo nga disposisyon. | Judy Ann Juare