2 ulitawo, gi-akusahang nanglugos – gisikop

Atubangon na sa duha ka mga ulitawo ang kasong pagpanglugos nga gisang-at ngadto sa korte batok kanila human nadakpan sa gihimong operisyon diha sa lungsod sa Dapa, probensya sa Surigao del Norte sa nakalabay’ng adlaw.

Giila ni Police Major Dorothy Tumulak, ang tigpamaba sa Police Regional Office (PRO) 13 ang mga dinakpan nga sila Jason Arellano, 34 anyos, ulitawo, drayber, nagpuyo sa Barangay Jubang ug Jayson Boncaros, 23 anyos, ulitawo, construction worker, residente sa Barangay 1, Poblacion, parehong sakop sa maong lungsod.

Samtang, ang mga biktimang dalaga mao sila alyas Joy ug alyas Grace.

Sumala ni Tumulak, gikuha matod pa ang mga biktima sa usa ka Abigail Antipasado aron papermahon og mga papeles lambigit sa ilang utang.

Gikombinse matod pa ni Antipasado ang duha nga mo perma ug bayran ang ilang utang oras makigkita kini sa supplier hinungdan nga nisugot usab ang duha nga makigkita kang Boncaros kinsa nagpaila nga  supplier sa isa ka tindahan sa Barangay 12 Poblacion.

Wala damha sa mga nahisgotan nga kalit silang gitukmod pasulod sa L300 van, gidala sa waiting-shed sa Barangay Jubang, pugos nga gipainom og bino ni Arellano resulta sa ilang pagkahubog ug nakatulog.

Namat-an na lamang matod pa sa isa ka biktima nga wala na siyay sapot ug tapad niya sa paghigda si Arellano samtang nakita usab niya ang kaubanang biktima nga gisumbag ug gilugos ni Boncaros.

Swerteng nakasibat hinungdan nga gikiha sa mga biktima ang mga nahisgotan sa paglapas sa Republic Act No. 9208  kun Anti-Trafficking in Persons Act of 2003 ug paglapas sa Republic Act No. 8353 kun Anti-Rape Law of 1997.

Kasamtangan, padayon pang gipangita si Antipasado aron manubag sa salaud nga nahimo.