SAYO pa sa buntag nabulabog na ang katawhan sa Sitio Toning, Carcon ug Skwala area sa Barangay Lagao gumikan may niabot nga daghang sakyanan unya adunay kargang mga ayuda, naguot ang ilang one way nga kalsada nga napuno pa sa mga lapok resulta sa kusog nga ulan ug baha sa kasamtangan nga tuig.
Pipila ka minutos ang milabay nanggawas na sa ilang kabalayan ang mga miyembro sa KaBrigadahan GenSan bitbit ang ilang mga card nga kolor puti nipadulong sa sakyanan nga adunay kargang daghang grocery items,ang uban nasulod sa mga sako.
Gipapila sa ilang coordinator ang mga miyembro sa KaBrigadahan GenSan aron masunod ang social distancing sa pagkuha sa ilang ayuda human nga naigo sa tubig baha ang ilang kabalayan.
Sumala kay Merly Campania, usaka inahan, baha kayo sa ilang lugar sa milabay nga adlaw taman tuhod ang tubig ug nisulod sa ilang balay.
Sumala usab kay Claudine Calamagan, nabahaan usab sila og Mayo 20 lang nahubas, nagapasalamat sila kay daku nga tabang kanila ang ayuda.
Sumala usab kay Carmen Calamagan nga adunay walo ka anak nagapasalamat gayod sila sa grocery items kay nagkinahanglan gayod sila og pagkaun.
Nagapasalamat usab sila nga nahatagan sila og higayon nga mahimong miyembro sa KaBrigadahan GenSan ug karon ilaha na nga natagamtaman ang resulta sa pagtinabangay human sila naigo sa baha.
Kuyog usab sa panon nga nagboluntaryo sa pagpanghatag og ayuda silang Kagawad Mike Tanzo sa Barangay Lagao.
Sumala ni Tanzo nga nanginahanglan gayod og tabang ang kayawhan, nasayod siya nga adunay ginahimo ang gobyerno alang sa mga kanal apan kulang pa.
Sumala usab kay kanhi konsehal Jun Avila nga kanhi usab kapitan sa Barangay Lagao nga nagboluntaryo usab siya sa pagkuyog sa Brigadahan aron makatabang sa nagkinahanglan.
Sa datus sa KaBrigadahan GenSan ang sumada sa mga benipisyaryo, Mayo 21 sa Carcon Extension 77,sa Sitio Toning Extension 50, sa Casa Luisa 18, sa Balite 20, sa Stephen Highway 50 sa katibuk-an anaa sa 215 ka benipisyaryo. ( Ever Diazon)