25 sentimos usbaw sa medium size nga itlog, retailer nangayo og pagsabot sa ilang mga suki

NISAKA og 25 Sentimos ang presyo sa itlog sa Central Public Market gumikan sa pagnihit sumala pa sa supply gikan sa mga poultry farms.

Sa pagtuyok sa taga Brigada Gensan sa palengke ang presyo sa itlog sa manok ang Small Size tag P5.00 ang usa ka buok, P60.00 ang usa ka dosena unya P150.00 ang usa ka tray, Medium Size P6.25 ang usa P75 ang dosena P187.50 ang tray, sa Large Size P6.50 ang usa, P68.00 usa ka dosena, P195.00 usa ka tray, ang Extra Large tag P7.00 ang usa, P84.00 ang dosena, P210.00 usa ka Tray, samtang ang Jumbo tag P7.50  ang usa ka itlog.

Sumala sa usa ka retailer nga si Anelen Marin nagsugod ang pagsaka sa presyo kaniadto pang ikadugang semana sa bulan sa Nobyembre sa Large Size ug nasundan sa Medium Size.

Ang rason daw sa usbaw sa presyo kay culling ang taga poultry farms sa ilang mga manok nga ginapa itlog mao nga nagnihit ang supply.

Panawagan ni Marin sa ilang mamalitay nga gumikan padulong na ang Kapaskuhan nagadako usab ang demand sa itlog mao nga natural lang ang pagsaka sa presyo ug hangyo niini nga dili lang masuko kanila ang ilang mga mamalitay. I Ver Diazon