3 km nga Swim Across the Bay sulayan sa 12-anyos nga PWD

GIPANIGURO ni Barangay Kagawad Dong Gonzales sa Barangay Bula nga siento porsientong andam na ang iyang 12-anyos nga anak nga si Bladimir Sebastian alang sa usa sa gikahinaman nga event sa 2023 SarBay festival.

Segon ni Kagawad Gonzales nga adlaw-adlaw silang nagapahigayon og training ug dili lang kay kausa kini nga nakaapil sa susamang event tungod kay nakadayo na usab sila sa ubang dapit hinungdan nga kumpiyansa kining makalahutay ang iyang anak.

Hinuon ang challenge lang karon nga Swim Across the Bay ang tungod kay medyo layo ang iyang languyon kon itandi sa una niyang mga giapilan.

Samtang si Bladimir ang wala nagduha-duha usab nga mitubag sa iyang kahandaan sa maong challenge sa dihang gipangutana kalabot sa iyang intrahan nga event karong Sabado Mayo 27.

Segon niini nga pinaagi sa tudlo sa iyang papa isip coach andam na kini sa iyang paglangoy.

Dugang pa niini nga wala usab kini ginakulbaan sa lain na usab nga hagit sa paglangoy.

Kalabot sa maong pagpangandam ni Bladimir, gikalipay ug ginapasigarbo ni Jose “Popoy” Patriarca, presidente sa mga PWD sa Barangay Bula chapter ang iyang kabarangay nga luyo sa iyang pagka-PWD apan mapakita niini ang iyang katakos pinaagi sa paglangoy.

Segon pa niini nga ang susamang abilidad ang mahimo nilang mapasigarbo ug sa umaabot nga panahon mahimo usab kining makahatag og dungog sa Gensan.

Nanghinaot nalang si Patriarca nga pinaagi ni Bladimir mahimo na kining sinugdanan nga ang ilang hut-ong ang malakip sa mga programa sa paugnat sa kusog nga alang sa ilang sektor. I Danny Casi