GIPAILAWUM na sa debriefing ang tulo ka mitahang NPA members aron maapil sa E-CLIP program sa gobyerno ug mahatagan sa ayudang pinansyal aron makabalik sa kinabuhing normal.
Una niini, tulo ka rebelde ang midangop sa mga personahe sa Magsaysay Municipal Task Force on Ending Local Communist Armed Conflict ug giindorso ngadto sa sa 39 Infantry Battalion nga nakabase sa Makilala North Cotabato.
Giila ni 39th IB commander Lieutenant Colonel Ezra Balagtey ang mga nahisgutan nga sila si Alyas Boyet, 55; alyas Bongcayaw, 51 ug alyas Sonny Boy, 32, pulos residente sa Purok 6, Brgy San Miguel, Magsaysay, Davao del Sur nga parehong mga myembro sa Guerilla Front (GF) ALIP, Far South Mindanao Regional Committee (FSMRC).
Ang mga nasangpit usab nagsilbi nga courier, organizer ug Special Partisan Unit (SPARU) sa GF ALIP, FSMRC kung asa dungan sa ilang pagtahan ang pag-uli sa ilang mga armas nga gilangkuban sa usa ka carbine riffle, kalibre 45 pistola, duha ka UZI pistol, usa ka 12 gauge shotgun, duha ka hand grenades, lima ka magazines, ug pipila ka mga bala.
Giangkon matud pa sa tulo nga nabalaka sila sa ilang seguridad human nga nawala na ang supurta gikan sa masa ug ang kanunay nga pagpahigayon og Community Support Programs sa Development Teams sa kasundaluhan.
Gisiguro sa 39th IB nga mahatag ngadto sa mga mitahang rebelde ang mga benipisyo nga angay nilang matagamtaman samtang giawhag ang ubang mga rebelde nga mobalik na sa sabakan sa balaud samtang duna pay panahon.BNFM-DAVAO