38,400 doses it Sinovac vaccine, nag-abot kahapon sa Western Visayas; Aklan may hueay nga 4,480 doses

KALIBO, AKLAN—Makaangkon it hueay nga 4,480 doses it Sinovac vaccine do probinsya it Aklan sa nag-abot nga 38,400 doses kahapon sa Western Visayas.

Suno sa Department of Health (DOH) 6, do probinsya it Iloilo do may pinakamabahoe nga alokasyon nga nagaabot sa 15,000 doses.

Do Capiz ag Antique hay mataw-an man it tag-4,480, Negros Occidental ag Bacolod City nga may tag-3,000 doses ag do Iloilo City hay may una nga 2,000 doses nga alokasyon samtang do nabilin nga 480 doses hay magiging buffer stock it DOH 6.

Nasayuran nga nagaabot eon sa kabilugan nga 139, 580 doses it Sinovac vaccine do nabaton it Western Visayas.

Sa pihak nga parte, nagapadayon man do vaccination roll out it tagsa ka mga LGU’s sa Aklan sa mga senior citizen ukon do mga kaeakip sa priority Group A2. // SHERRY ANNE REUNIR-VIDAL