Nasa kustodiya na ngayon ng mga otoridad ang apat na mga kalalakihan matapos na maaresto sa ikinasang operasyon laban sa iligal na sabong sa Sitio Kilo-Kilo, Brgy. Makina, Balete, Batangas, dakong alas-4:35 ng hapon kahapon, Mayo 10, 2023.
Kinilala ng Balete Municipal Police Station ang mga suspek na sina Neil Anthony Manalo y Cabungcal, 38-anyos; Mark Osmillo y Katigbak, 39 anyos; Lester Coronado y Robles, 39 anyos, pawang mga residente ng naturang barangay at Leonardo Ilag y Plata, 40 anyos, residente ng Brgy. Malapad na Parang, Lobo, Batangas.
Ayon sa imbestigasyon, inilunsad ng intelligence personnel ng Balete MPS ang anti-illegal cockfighting operation matapos na makatanggap ng report hinggil sa pagtu-tupada sa naturang lugar.
Akto ang mga ito na nahuli na nagsasabong at narekober ang isang manok na panabong; dalawang patay na manok na panabong, pitong tari, isang kahon, mga gamit na ballpen at taya na nagkakahalaga sa Php12,180.00.
Mahaharap ang mga naaresto sa kasong paglabag sa PD 449 o Illegal Cockfighting.