Patay ang 4 ka miyembro sa New People’s Army sa engkwentro tali sa 1st Special Forces Battalion Philippine Army sa Kilometer 24, Barangay Tikalaan, Talakag Bukidnon.
Gibutyag ni 403rd Infantry Brigade Philippine Army Commander Brigadier General Ferdinand Barandon nga gilangkuban ang mga napatay nga NPA sa tulo ka lalaki ug usa ka babae polus mga miyembro sa Platoon Ipod, Sub-Regional Committee 5 sa North Central Mindanao Regional Committee.
Muabot sa 30 ka rebelde ang naka-engkwentro sa militar sulod sa dul-an duha ka oras. Resulta sa maong engkwentro ang pagka-rekober sa 16 ka mga tag-as nga armas, mga assorted nga mga gamit, subersibong dokumento ug duha ka NPA flags.
Sa karon ang mga narekober nga patay’ng lawas ug mga armas, giturn-over na ngadto sa Talakag Municipal Police Station alang sa pag-proseso.
Sa nahisgutan nga operasyon, walay natala nga samaron sa bahin sa militar ug luwas sab ang mga residente sa maong lugar. Subay niini, gikompirma ni Brigadier General Barandon nga ang nahitabo nga engkwentro, walay kalabutan sa pagtahan sa usa ka high-ranking NPA leader sa Platoon 3, Sub-Regional Committee 5 NCMRC nga taga Barangay San Rafael, Talakag Bukidnon nga gi-presentar kagahapong adlawa sa Police Regional Office 10.
Tungod sa sunod-sunod nga operasyon sa militar batok sa NPA, ug pagtahan sa mga lider ug miyembro niini, wala giwala sa otoridad ang posibling retaliatory attacks o pagpanimalos sa rebeldeng grupo.-END-