Boluntaryo nga nagsungka sa talatapan ni Mayor Dante Rizal Eslabon ang apat ka persona nga may kahilabtanan sa pagpatay kay John Fria sadtong Nobyembre 2022 sa Mabini corner Mejorada, Barangay Inzo Arnaldo, Roxas City.
Ginkilala ang mga akusado nga sanday Barangay Kagawad Lamberto Fajartin, 56-anyos; Vicente Fajartin, 29-anyos; Melchor Fajartin, 30-anyos kag Johnny Fajartin, 41-anyos lunsay mga residente sang Brgy. Pinamalatican, Sigma, Capiz.
Gilayon man nga gindala sa Sigma Municipal Police Station ang mga akusado kag ginserbihan sang warrant of arrest sang kapulisan sa kaso nga Murder nga gin-isyu kag ginpermahan ni Hon. Lorencito Diaz, Presiding Judge, RTC 6, napetsahan Agosto 1, 2023.
Wala naman sang piyansa nga ginrekomendar ang korte sa temporaryo nga kahilwayan sang mga suspetsado.
Kun madumduman, nagresponde ang mga katapo sang Roxas City PNP sa report nga may nasunog nga salakyan sa Barangay Inzo kag may nakita nga tawo sa sulod kun sa diin sa ginpatigayon nga imbestigasyon, nadiskubrehan nga ginluthang ini sang makapila ka beses antes ginsunog.
Sa karon, nagapabilin na sa kustodiya sang Sigma PNP ang nasambit nga mga persona para sa nagakaigo nga disposisyon. | Judy Ann Juare