LEGAZPI CITY – Pupunan na ngunyan na aldaw an aktibidad kan Department of Trade and Industry (DTI) Bicol o an Orgulyo kan Bicol Trade and Travel Fair sa Shangri La, Mandaluyong, Metro Manila.
Sa intrevista kan Brigada News FM Legazpi kay DTI Bicol Regional Spokesperson Bhem Berango, sinabi niya na taon-taon ining pigsasagibo tanganging i-expose asin darahon sa mas dakulang merkado an mga produkto kan rehiyon hale sa mga Micro-Small, Medium Enterprises (MSMEs).
Maabot man sa labi 100 an dinara asin nagpartisipar na MSMEs sa nasambit na aktibidad tanganing tawan nin tyansang i-showcase an saindang produkto sa mas dakulang merkado.
Sa oras na maibida ninda an mga produkto kan rehiyon, magkakaigwa sinda nin individual buyers o institutional buyers.
Duwang kategorya an ibibida sa aktibidad asin kaiba digdi an food asin non-food items.
Sa food, dae mawawara an mga paboritong delicacies siring kan Bicol Express, laing, pili nut asin iba pa mantang sa non-food naman iyp an hand-crafted materials na gibo sa abaca, local materials asin kadakol pa.
Segun pa kay Berango, taon-taon igwa sindang ibibida na bagong produkto na maabot sa 253.
Tinawan-doon pa kaini na magkakaigwa nin special settings sa aktibidad kun saen nagbugtak sinda nin Christmas village na saro sa highlights sa OKB na gibo sa abaca products.