42 ka Pamilya nga naigo sa balud sa GenSan nakadawat og tabang

KALIPAY ang gibati sa mga residente sa Sarif Mucsin, Barangay Baluan nga naapektuhan sa kusog nga balud human nakadawat og hinabang gikan sa City Disaster Risk Reduction and Management Office o CDRRMO.

 Kahibaloan kapin 180 ka indibidwal ang apektado lakip mga bata ug tigulang nga kasamtangang nagtinir sa gym sa Baluan. Ang matag pamilya nakadawat og 10-kilos nga bugas ug mga gamit sama sa banig, kaldero, ug plato.

Si Ricky Ticam usa sa mga residente nga nagub-an og balay ang nakadawat og hinabang. Dako iyang pagpasalamat tungod sa gihatod nga tabang sa mga opisyal sa LGU GenSan nga gipangunahan sa labaw sa City Disaster nga si Dr. Bong Dacera.

Matud ni Ticam nahurot og kaanod sa tubig dagat ang tanang gamit sa ilang balay lakip nawala ang iyang bangka apan iyang gipasalamatan ang labaw nga makagagahom tungod luwas ang tibook niyang pamilya. Ang uban sa mga residente nawad-an og panginabuhian apan ilang gisiguru nga maluwas ang tibook nilang pamilya sa kalamidad.

Padayong gimonitor ni Kapitan Armando Diamante ang ubang panimalay daplin sa baybay sa nahisgotang lugar ug wala pa niini gitugtan ang mga residente nga mobalik sa ilang mga panimalay hangtod dili masiguru nga luwas nang balikan ang lugar.

Leave a Reply

Your email address will not be published. Required fields are marked *