Dakpan ang lima (5) ka mga indibidwal sa gilusad nga drug buy bust operation sa mga personahe sa Tagum City Police Station, Mayo 25, 2023 alas-11:55 sa gabii sa Barangay La Filipina, Tagum City, Davao del Norte.
Subject sa maong operasyon ang drug den maintainer nga nailang si Gerry Laurencio alyas Nono, 39 anyos, Warehouse In-Charge ug residente sa nasangpit nga lugar.
Naaktuhang napalitan ang suspek sa nagpaka-aron-ingnung pulis og usa ka pakete sa gidudahang shabu nga mutimbang sa kapin kon kulang usa ka gramo nga mubalor sa Php10,000.00.
Samtang, naaktuhan sab nga nag-shabu session sulod sa drug den sila Gilbert Africano, Rutcheb Largo, Stephen John Lamonte ug Rene Mijares.
Narekober sa otoridad ang gituohang shabu nga mutimbang sa onse gramos nga dunay DDB Value nga Php74,800.00, ug nagkadaiyang drug paraphernalia.
Kasamtangan, tingkagol na sa bilangguan ang mga dinakpan samtang kasong kalapasan sa Republic Act 9165 kon Comprehensive Dangerous Drugs Act of 2002 ang atubangon sa mga suspek.