Lima ka tawo ang kompirmadong patay sa nahitabong disgrasya sa N. Bacalso Avenue Lawaan 3, Talisay City, Cebu pasado alas 9 kagahapon sa buntag Nobyembre 3, 2021.
Sa 19 ka tawo nga nalambigit sa disgrasya sa kadalanan sa dakbayan, lima niini ang nakalas samtang ang 13 kanila wala ray angayan nga kabalak-an.
Ang mga namatay, giilang maoy suspect/driver sa truck nga nidaro nga si Benchin Udtohan, taga Zamboangga del Sur; Jose Wendel Cataquez, 66 anyos; Paquito San Pedro, 29 taga Apas Cebu City; Glenn Baclay, 24 anyos, taga Maghaway Talisay ug usa ka wala pa mailhing babaye.
Ang maong aksidente naglambigit sa duha ka ten wheeler truck, usa ka 6 wheeler, lima ka motorsiklo ug isa ka bisikleta.
Samtang ang naangol nga nahiagom ug grabe nga mga bun-og mao sila si Nelo Pasa Rublica, 35 anyos nga taga Tabunok; Rey Discos, 47 anyos molopyo sa Guadalupe Cebu City; Evan Minguel Magaoay Reyna, 15 anyos nga taga Lawaan 3 ug Paquito San Pedro Sr. nga taga Apas ug ang uban nga biktima nanguli ra dayon human sa hitabo.
Base sa imbestigasyon sa kapolisan sa dakbayan sa Talisay, ang ten wheeler truck nga paspas ang dagan nawad-an og control ug nibangga sa mga sakyanan nga nag-una hinungdan sa pagkamatay sa lima.