5 naaresto ag kinasuhan bangud sa pag eabag sa Anti-Drunk Driving Operations sa Aklan

Kapin sa ap-at nga dominggo eon makarun ro nakataliwan halin kat ilunsar it Land Transportation Office (LTO-Aklan) ag PNP ro Anti-Drunk Driving Operations sa probinsya it Aklan.

Bangud kara, matsa nagnaba ro kaso it mga aksidente sa daean bangud sa kahilungon. 

Base sa post ni Engr. Marlon L. Velez, Chief LTO Kalibo District Office, ro LTO Kalibo ag Aklan Provincial Police Office hay owa gakatueog ag 24/7 nga bugtaw para sa pagbantay sa mga karsada sa bilog nga Aklan.

Ro APPO hay nagtaeana it 10 PNP personnel para mag-augment sa LTO Kalibo para sa hugot nga pag-implementa sa anti-drunk driving ag naga report sanda sa LTO Kalibo 24/7 agud magresponde sa mga aksidente sa karsada o mga aksidente sa saeakyan nga may kaangtanan sa pagmaneho it hilong ag para magbulig sa mga checkpoints.

Samtang, base sa record it LTO Aklan, may lima nga naaresto ag napasakaan it kaso sa korte bangud sa pag eabag sa Anti-Drunk Driving Operations.

Uman nga nagpadumdom ro pamunuan it LTO nga likawan ro pagmanehu it hilong agud makalikaw sa disgrasya sa daean. / ANN DESLENE SALAZAR