LEGAZPI CITY – Maabot sa 50 mga rehistradong botante hale sa Brgy. Capantawan, Legazpi City an mapartisipar sa pilot testing kan eleksyon sa mga malls para sa Barangay and Sangguniang Kabataan Elections (BSKE) na ikokondusir sa dakula asin bistadong mall sa syudad sa maabot na Agosto 14, alas 7:00 nin agad hasta alas 12:00 nin hapon.
Segun kay Commission on Elections (COMELEC) Legazpi City Election Supervisor Atty. Connie del Castillo, obheto kan mall voting simulation na maaraman an kahandaan kan mga electoral boards sa pagsagibo kan saindang trabaho sa voting, canvassing asin retrieval process.
Dugang pa ni Castillo, digdi na mahihiling an mga problema na posibleng kahampangon sa eleksyon, asin mas tatawan nin atensyon digdi an mga vulnerable sectors siring kan mga senior citizens, PWDs asin mga bados.
Mientrastanto, sa datos kan komisyon, nasa labi 700 na mga botante sa nasambit na barangay an nakatalaang magboto sa BSKE.