Matagumpay na nagtapos ang 50 mga inhinyero ng Department of Public Works and Highways (DPWH) Bicol sa 21 araw na Comprehensive Training para sa DPWH Field Engineers na isinagawa sa DPWH-5 Multi-Purpose Hall, Rawis, Legazpi City .
Ayon kay DPWH 5 regional director, Virgilio Eduarte, ito ang unang face-to-face comprehensive training mula noong nagsimula ng pandemya.
Hinimok nito ang mga kalahok na tumutok sa mga sesyon ng pagsasanay, at inatasan niya silang ibigay ang kanilang makakaya sa mahahalagang aktibidad sa pag-aaral at pagpapaunlad na ito.
Ang komprehensibong pagsasanay ay sadyang isinagawa upang mabuo ang mga teknikal at managerial na kakayahan ng DPWH Field Engineers.
Dagdag pa ng opisyal, ang paglinang ng mga tamang tao upang mangasiwa sa tamang proyektong maihahatid sa tamang panahon ay magtutulak sa rehiyon sa tamang landas tungo sa pagkamit ng bisyon at misyon nito.
Kasama sa pagsasanay ang mga serye ng malawak na lecture, laboratory works, field inspections, group presentations, at on-the-job training kung saan sila ay na-expose sa field upang obserbahan at suriin ang mga proyekto ng DPWH sa loob ng lalawigan ng Albay upang mapahusay ang kanilang mahalagang papel sa pagtiyak ng kalidad at ligtas na mga proyektong pang-imprastraktura.
Ipinaabot din nito ang pasasalamat sa 17 resource speakers sa kanilang pagpayag na ibahagi ang kanilang oras, kaalaman at karanasan para sa paglago at pag-unlad ng DPWH engineers.