Nakadawat og tag-50 mil ka pesos nga tabang gikan sa gobyerno ang siyam ka mga nailo nga kabataan human ang ilang mga ginikanan gipamatay sa mga gidudahang mga rebelde nga Communist Party of the Philippines-New People’s Army (CPP-NPA) sa Guihulngan City, Negros Oriental.
Ang mga anak ni anhing Rodrigo, 46, ug Celerina Lubay, 44, taga-Barangay Trinidad, Lungsod sa Guihulngan, naglisud sa ilang adlaw-adlaw nga panginabuhian, gitabangan sa mga paryente samtang nag-amuma usab alang sa ilang kaugalingon, human gipatay ang ilang mga ginikanan kaniadtong Mayo 14 .
Ang magtiayong Lubay, kauban si Ronelo Quirante, 56, ug Roger Fat, 46, gipatay sa mga suspetsadong myembro sa Leonardo Panaligan Command-NPA sa Central Negros, sa Sitio Agit sa Barangay Trinidad.
Ang mga biktima giakusahan nga mga informant sa militar.
Gipahibalo ni Army 1st Lt.Roselyn Balean,ang Acting Military Operation Officer sa 62nd Infantry Battalion (IB) nga ang kamanghuran nga batang nailo nag-edad og syete anyos ug gilangkuban kini sa unom ka lalaki ug tulo ka babaye. Adunay silay yuta nga uma samtang ang mga mas bata magtinguha nga makaeskuyla bisan pa sa mga kalisdanan.
Asoy pa ni Reneboy, 24 anyos,anak sa biktima,gikutlo sa mga walay kasingkasing nga mga rebelde ang kinabuhi sa ilang ginikanan bisan anaa sila nagtan-aw.
Ang CPP-NPA nalista isip usa ka teroristang organisasyon sa Estados Unidos, European Union, United Kingdom, Australia, Canada, New Zealand, ug sa Pilipinas.///Ariel Morro Amistoso