Nasa mahigit limang libong mga aplikante mula sa Lambak ng Cagayan ang nakilahok sa isinagawang online Independence Day Job Fair ng Department of Labor and Employment (DOLE) Region 2 noong Sabado, June 12, 2021.
Sa panayam ng 92.9 Brigada News FM Cauayan kay DOLE Region 2 Information Officer Chester Trinidad, nasa 1,261 ang binuksang trabaho mula sa 60 na establishimento sa rehiyon sa naturang job fair katuwang ang trabahanap.com.
Aniya, mayroong 500 na positions ang available abroad at mahigit 300 naman na job opportunities ang bukas sa loob ng rehiyon.
Dalawang aplikante aniya ang na-hire rin sa mismong araw habang umaasa naman siyang madaragdagan pa ito sa mga susunod na araw.
Mayroon aniyang mga aplikante na “near-hire” kung saan maari silang tawagan ng mga employer na kanilang inaplayan para iberipika ang kanilang mga dokumento at kung pasok sa naturang position.
Gayunman, sakaling hindi sila makukuha ang kagandahan aniya sa pakikilahok sa Independence Day job fair ay pwede silang i-refer ang mga aplikante sa iba pang serbisyo at programa ng partner agencies ng DOLE.
Maari aniya silang i-refer sa Bureau of Workers with Special Concerns para sa livelihood assistance at sa DTI para sa business opportunity.
May mga nag-apply din para sa domestic helper abroad, accounting clerk, mechanic at maging sa position sa nurse at therapist.