Arestado ang anom ka indibidwal matapos nadakpan sa akto nga nagapatigayon sang iligal nga pagpangisda sa kalalawran nga sakop sang Brgy. Punta Cogon, Roxas City.
Ginkilala ang mga naaresto nga sanday Virgilio Barrios, 27-anyos, boat captain kaupod ang lima ka crew: Rodel Bargo, 49-anyos; Nelson Bargo, 26-anyos; Neljohn Montaño, 26-anyos; Leo Montaño, 36-anyos kag Jonald Palma, 30-anyos nga lunsay mga residente sang Brgy. Culasi, sining syudad.
Narekober sa mga nadakpan ang isa ka fishing boat nga ginapanag-iyahan ni Felicitas Barrios nga ginabanta nagabalor sang P180,000, fishing gear/net nga nagabalor naman sang P20,000.
Magapangatubang sa pagbayolar sa City Ordinance No. 16-2007, Sec 59 ukon Unlicensed Fishery ang mga nadakpan.
Sa karon, nagapabilin ang mga ini sa kustodiya sang City Fishery and Agriculture Office lakip na ang mga nakumpiskar para sa nagakaigo nga disposisyon. | Judy Ann Juare