Anaa sa unom ka mga personnel sa Special Operations Group-7 sa PNP Drug Enforcement Group (PDEG-7) ang girelibuhan sa katungdanan sa Camp Crame human gipasakaan og duha ka mga kaso sa National Bureau of Investigation (NBI-7) tungod sa giingong pagdagit, ug pag-torture sa usa ka lalaki ug babaye nga taga Minglanilla, niadtong buwan sa Marso.
Matod ni Police Lieutenant Colonel Gerard Ace Pelare, spokesperson ni Police Brigadier General Anthony Aberin, hepe sa Police Regional Office-7 nga ang maong mga personnel ubos sa direkta sa Camp Crame ug dili sa PRO-7.
Sa unom ka mga suspek, upat lang ang nailhan sa imbestigasyon sa National Bureau of Investigation (NBI 7) nga mao sila si Staff Sergeants Rey David Aumentado, Jemechiel Gemang, Rex Forrosuelo ug Marjun Milar.
Ang maong mga suspek gipasakaan ug kasong kidnappping and serious illegal detention ubos sa Article 267 sa Revised Penal Code as amended by Sec. 8 sa Republic Act 7659 ug grave misconduct nga kalapasan sa Republic Act 6713 kun Code of Conduct and Ethical Standards for Public Officials and Employees.//