MISURRENDER ang pito ka Communist NPA Terrorists (CNTs) bitbit ang tulo ka mga high-powered firearms sa 56th Infantry (Tatag) Battalion sa Sitio Central Baugan, Brgy. Palma Gil, Talaingod, Davao del Norte, niadtong milabay’ng Setyembre 16, 2023.
Ang mga misurender mao sila alyas Fernando Poe, alias Rustom, alias Sarmontano, alias Adolfo, alias Agata, alias Rica, ug alias Andrew E nga puros miyembro sa Sub-Regional Sentro De Grabidad PEDDLER, Sub-Regional Committee sa North Central Mindanao Regional Committee (NCMRC), nga ga-operate sa border sa may Bukidnon ug Talaingod.
Gumikan sa hiniusang pagpaningkamot sa 56IB ug 1003rd Infantry (Raptor) Brigade hinungdan sa pagbalik sa sabakan sa gobyerno sa mga nahisgutan.
Sumala pa ni alias Fernando Poe, Team leader sa maong grupo nga gikapoy na sila sa pagtago- tago sa gobyerno ug walay igong pagkaon hinungdan nga misurender na lamang sila.
Gidayeg sab ni Brigadier General Allan D. Hambala, acting Division Commander sa 10th Infantry (Agila) Division ang mga surrenderees sa nahimo nilang desisyon.
Dugang pa ni Brig. Hambala, nga padayon ang ilang hanay sa pag awhag sa mga nahibiling sakop sa NPA nga musurender, samtang hugot sab ang ilang pagbantay aron nga dili makasulod ang mga armadong grupo sa Davao Region.
Kasamtangan, anaa na sa kustodiya sa 56IB ang mga nahisgutan alang sa debriefing ug medical intervention.
Maka-avail sa Enhanced Comprehensive Local Integration Program (E-CLIP), o ang assistance program sa gobyerno ang mga kanhi rebelde.