Gikumpirma ni Anne Aloot, Health Educator sa City Health Office sa Gensan nga mikabat na sa 737 ang ihap sa natalang kaso sa dengue sa siyudad kung asa walo niini ang namatay.
Base sa datus sa City Epidemiology and Surveillance Unit kun CESU ang maong datus gikan Enero 1 hangtud Hunyo 11 ning tuiga.
Ang top 10 barangay’s nga dunay taas nga kaso sa dengue mao ang Fatima nga mokabat sa 135; Calumpang 119; San Isidro 108; Labangal 84; Lagao 54; Tambler 37; Bula 31; Apopong 31; City Heights 30; ug Barangay Mabuhay 17 ka kaso ang natala. Matud ni Aloot, sagad sa mga naigo sa dengue anaa sa 9-anyos ang edad.
Tungod sa sigeg ulan, dako og tiyansa nga mapondo ang tubig gikan sa mga paso, ligid, botelya, tambak nga basura susama sa container ug uban pa.
Sigun ni Aloot, pipila sa mga sintomas sa dengue mao ang pabalik-balik nga hilanat o moabot og duha hangtud pito ka adlaw; pagpamula sa panit; magdugo ang ilong; walay gana mokaon; pagsuka-suka o lipong-lipong ug skin rashes.
Pirmeng pahimangno sa ilang buhatan nga kung duha ka adlaw na ang hilanat, dad-on na dayon sa doktor aron mapa-checkup.
Tambag usab niini sa katawhan nga sundon ang 3’o clock habit nga mao ang 4S strategy, “Search and destroy” mosquito-breeding sites; “Self-protection measures” susama sa pagsul-ob og long pants ug long sleeved shirts, ug pirmeng paggamit og mosquito repellent; “Seek early consultation”, ug ang “Support fogging/spraying.”
Photo: Posibleng pangitlugan sa lamok nga resulta sa sakit nga dengue.