Arestado ro waeong katawo matapos segun nga sudlon ag tutukan it baril ro mga staff it Cerca Hotel sa isla it Boracay ku nagtaliwan nga adlaw it Sabado.
Ginkilaea ro mga inarestong sanday Conrad Ilagan, Jomar Solano, Roqui Tumbagahan, Gardie Maming, Carlos Ingo, Jomar Guevarra, Mel Jhon Fernandez, ag Baldonero Torres, tanan hay sa legal nga edad.
Sa report, samtang nagapungko sa lobby it nasambit nga hotel ro ap-at nga staff kaeakip ro assistant manager, nakibot eon lang sanda kat nagsueod ro ap-at nga eaeaki nga naka sibilyan.
Insigida segun nga ginbuoe it suspek nga si Jomar Guevarra ro baril kara sa anang sling bag ag gintutok kanda.
Bangud sa kahadlok hay insigida nga nagdaeagan paguwa ro mga staff ag nagpangayo it bulig sa Malay MPS.
Kat bumalik eon ro mga staff sa hotel, hay nakita nanda ro sambilog sa mga suspek nga si Ingo nga nag ilis eon it anang security uniform.
Nagresponde man eagi ro Malay MPS sa lugar ag nakumpiska ro 9mm pistol ag shotgun.
Gindayaw man ni PNP OIC Lt. Gen. Vicente Danao Jr., ro madasig nga pagresponde it Malay MPS ngani owa it nasakit sa insidente.
Padayun man ro imbestigasyon para matumod ro background ag motibo it mga suspek. / ANN DESLENE SALAZAR