80k individuals, inilikas dahil sa Bagyong #KardingPH

Aabot na sa 78,907 indibidwal o katumbas ng 20,400 na mga pamilya ang apektado at nagsilikas dahil sa paghagupit ng Bagyong Karding.

Sa isang pulong balitaan, sinabi ni National Disaster Risk Reduction and Management Council o NDRRMC Deputy Spokesperson Asec. Raffy Alejandro na mayroong 84 barangay ang apektado ng bagyo mula sa Regions II, III, IV-A, IV-B, V, Cordillera Administrative Region, at sa Metro Manila.

Ayon kay Alejandro, higit na naapektuhan ay ang mga Lalawigan ng Bulacan, Quezon Province at Nueva Ecija.

Sa inisyal na assessment – hindi umano matindi ang pinsalang idinulot ng bagyo sa imprastraktura, ngunit higit na naapektuhan ang agriculture sector partikular na sa Nueva Ecija.

Aabot sa 740 mga magasaka ang apektado at kabuoang 16,299 na ektaryang pananim ang nawasak dahil sa Bagyo.

Wala pa rin aniyang stable na supply ng kuryente sa Quezon at sa Camarines Norte.

Samantala, maaari naman na aniyang bumalik ang mga evacuees sa kanilang mga tahanan sa oras na ma-clear na ang kanilang mga area.

Maaari na ring mag-resume ang klase sa mga paaralang hindi na kabilang sa wind signals simula bukas.
#