NAGAMIT na sa Soccsksargen region ang 81% sa bakuna batok Covid-19, base sa datus sa Department of Health (DOH) 12. Matud ni Dr. Edvir Jane Montañer, DOH-12 Center for Health Development immunization coordinator naa sa 82.45% sa kinatibuk-ang ihap sa alokasyon nga Sinovac vaccine ang nagamit na.
Samtang naa sa 108.36% nga alokasyon sa AstraZeneca ang na-administer ug syento porsyento sa Sputnik V. Naa na usab sa 57.37% sa alokasyon sa rehiyon sa Pfizer ang nagamit na sa nagpadayong vaccination rollout, 81.29% ug 56.13% ang Sinopharm.
Dugang ni Montañer luyo sa mga nagamit nang bakuna dako pa ang porsyento sa mga Covid-19 vaccine ang naa karon sa DOH ug mga health offices sa rehiyon.
Sa ulahing tala sa DOH-12, misaka na sa 1,196,571 ang kinatibuk-ang bakuna nga nagamit gikan Marso asa naa sa 575,766 ang fully vaccinated ug naa sa 620,805 ang naghulat sa ikaduhang dose.
Luyo niini, naa pa sa 34.96% ang vaccination coverage gikan sa target nga 3,490,115 o 70% nga adult population sa Soccsksargen. Lakip sa vaccination coverage sa DOH-12 ang Cotabato City nga karon ilawom na sa Bangsamoro Autonomous Region in Muslim Mindanao. (Richel Gubalani)