Patay ro sangka 81yo nga lola matapos mabungguan it sangka motorsiklo sa national highway nga sakop it Barangay Gibon, Nabas, Aklan.
Base sa Nabas Municipal Police Station, bandang alas-8:30 it gabii kat matabo ro aksidente sa nasambit nga lugar.
Nagatikang segun ro biktimang si Leonora Antonio, residente it nasambit nga lugar kat mabangga imaw it motorsiklo nga ginamaneho ni Hernan Antolin Oczon, 52yo it Barangay Nabaoy, Malay, Aklan kaibahan ro unga kara nga backrider.
Sa kabaskug it pagkabunggo, inapok it pilang metro si Antonio ag umigo sa konkretong karsada.
Nag-angkon it nina sa ueo ag iba pang parte it kaeawasan ro lola nga gindaea pa sa ospital pero namatay man.
Posible man nga magpangatubang sa kasong reckless imprudence resulting to homicide ro driver it motorsiklo nga sa kustodiya eon it pulisya. / ANN DESLENE SALAZAR