Temporaryo nga ginpasara it local government unit it banwang Ibajay ro recreational facilities bangud sa pagtinaas it kaso it covid-19.
Ro nasambit nga mandu hay epektibo ku Hunyo 7.
Madumduman nga ro banwang Ibajay iya sa probinsya it Aklan hay na-classify bilang covid-19 high-risk area kung siin, nakalista raya it 81 nga aktibong kaso ku Hunyo 8.
Ap-at nga residente ro namatay sa sakit samtang 96 man ro nakarekober.
Ro pagpasara it mga recreational facilities hay may tinutuyo nga punduhon ro pagkalat it covid-19.
Ro ginapatuman nga Executive Order No. 17 iya sa Aklan hay naga sakop sa tanan nga pampubliko ag pribadong beach resorts, pool, bar ag mga tourist spots it banwa. / ANN DESLENE SALAZAR