Nagpagawas og abiso ang Cybercrime Investigation and Coordinating Center (CICC) ngadto sa publiko kalabotan sa mga aberya sa Viber platform nga na-detect kagahapon.
Namatikdan sa CICC alas 10 kagahapon sa buntag, Setyembre 26,2023, ang pakyas nga pagpadala og video ug file transfer gamit ang Viber platform.
Dugang sa ahensiya nga wala hinoon naapektuhan ang voice calls o pagpadala og mensahe pinaagi sa maong platform.
Ang maong abiso miabot wala pay duha ka semana human ang pormal nga paglusad sa Consumer Application Monitoring Systems (CAMS) aron nga maoy magmonitor sa online applications aron nga masiguro ang proteksiyon sa mga consumer.
Sumala pa ni CICC Executive Director Alexander K. Ramos nga dakong tabang ang CAMS sa pagdetect sa maong problema, nagpasabot lamang kini nga epektibo kini nga matang sa himan.