Nagpakatagam-tam an mga parag-uma ha Abuyog Leyte hin mga farm machineries and equipment tikang ha Agrarian Reform Secretary Conrado Estrella III ngan Senator Imee Marcos durante han pagbisita hini ha Eastern Visayas.
Deri naman makatuod hi Rodrigo Alumbro, presidente han Canmarating, Odiongan, Pagsang-an, Sulpa Irrigators Association (COPS-IA) nga nakakarawat hira hin sugad hini nga hinabang tikang ha Department of Agrarian Reform (DAR).
Labot la ha farm machineries and equipment nga ira nakarawat mayda gihapon grass cutter nga dako nga bulig agud mamintinar an ira irrigation canals.
Mahuman ighatag an katunga kamilnyon nga assistance in nagpatawag naman hin meeting hi Alumbro ha mga opisyal han COPS-IA agud paghimangrawan an operations and maintenance han nasabi nga mga farm machineries.
Sumala kan Alumbro, maabot 107 nga mga rice farmer members kalakip an 55 agrarian reform beneficiaries (ARBs) an nag-uuma ha 181 hectares nga umhanan.
Subay naman ha Chief of the Program Beneficiaries Development Division, Melecia Ong, an COPS-IA, in usa ha duha nga inisyal agrarian reform beneficiaries organization (ARBO) an recipients ha Eastern Visayas han farm machineries and equipment, ha ilarom han Sustainable and Resilient Agrarian Reform Communities program.
Sugang pan han opisyal nga labot ha farm machineries in makakarawat gihapon an COPS-IA hin hauling truck, nga magagamitan han ARBO ha pagtransport han ira produce.