Ginatun-an makarun ni Aklan Governor Joen Miraflores ro posibleng pag-require sa mga residente nga magsuksok it facemask sa pampublikong lugar bangud sa uman nga pagtaas it kaso it covid-19 sa probinsya.
Sa ginhiwat nga pulong nga ginpatawag it Gobernador, gin-report itAklan Provincial Health Office nga ro probinsya hay may una nga 23 active cases ag ap-at ro namatay bangud sa covid-19.
Ro nasambit nga meeting hay gintambungan it mga miyembro it Provincial Inter-Agency Task Force on COVID-19.
Kapin sa 15 ka banwa eon sa Aklan ro nakalista it kaso it covid-19 ku nagtaliwan nga dominggo, sa pihak nga ro probinsya hay nagapabilin sa alert level 1.
Matandaan nga Mayo 16, nag isyu si Altavas Mayor Denny Refol Sr. it Executive Order 005-2023, nga ginapasuksok it face mask ro publiko sa mga pampublikong lugar.
Samtang, sa banwa it Malay, gin-engganyo ni Municipal Health Office Dr. Athena Magdamit ro mga residente nga magsuksok it facemasks samtang sa Boracay. // ANN DESLENE SALAZAR