LEGAZPI CITY – Patuloy ngayon ang pag-iikot ng Albay Police Provincial Office (PPO) sa mga sementeryo upang siguradohing may PNP personnel na inilatag ang bawat police station.
Tiniyak ni PCOL. Fernando Cunanan, head ng nasabing opisina, na ang lahat ng bibisita sa puntod ng kanilang mga mahal sa buhay ay magiging maayos at ligtas.
Aniya, kailangan doblehin ang paghihigpit ng kapulisan sa mga pumapasok sa sementeryo upang walang makakalusot na mga ipinagbabawal tulad ng matatalim na bagay, baraha, sound system at iba pa.
Nagbigay na rin ito ng kaukulang tuntunin sa bawat police station bago pa man pumasok ang Undas.
Katuwang ng mga otoridad sa pagpapanatili ng kaayusan at katahimikan ang mga barangay officials dahil sila ang nakakaalam ng lugar.
Pakiusap ng opisyal sa lahat na mga papasok na sumunod lamang sa anumang ipinatutupad sa mga sementeryo upang walang kaguluhang mangyari.