-Reymund Titong
KABANKALAN CITY, Negros Occidental — 19 sa 35 ka mga public health facilities sang syudad sang Kabankalan ang nahamtang sa flood-prone areas ukon may tyansa nga maglubog sa baha kun tuman na ang bubo sang ulan.
Sa gin-patigayon nga risk assessment sang Brigada News FM-Kabankalan, nahibaluan nga 54.3% sang mga government-owned healthcare facilities sang syudad ang sa karun nahamtang sa nanuboan nga lugar sa 19 sini ka barangay, sa tion nga may baha nga matabo bangud man sang bagyo ukon habagat.
Ang pamangkot sa karun, ano na ang mangin papil sang mga healthcare facilities sa tion sang pagbaha, kun pati ang ila mga opisina lubog sa tubig?
Sa syudad sang Kabankalan, nalakip sa “moderately prone” sa baha ang mga health facilities sa siyam ka barangay sa poblacion, Binicuil, Camansi, Daan Banua, Dr. Gumersindo Garcia Memorial Hospital, Kabankalan City Health Office, Linao Barangay Health Station, Lorenzo D. Zayco District Hospital, Salong Barangay Health Station, kag Talubangi Barangay Health Station. Samtang ang Camugao Barangay Health Station ang na tagged bilang “high-risk” sa baha.
Base sa hydro-meteorological hazard assessment sang Mines and Geosciences Bureau (MGB), ang mga lugar na na geo-tagged bilang “moderate prone” sa baha ang posibli maka experyensya sang baha nga naga-taas 0.5 metro tubtob 1 ka metro, nga posibli magadugay naman sang isa tubtob tatlo ka adlaw antis magtahaw.
Sa piyak nga bahin, sa datus sang Commission on Audit (COA) sang 2022, ang syudad sang Kabankalan ang ika tatlo nga may pinakamataas nga gasto sa disaster response nga may yara sa P336 pesos nga average nga gasto kada tawo. Samtang ang syudad naman sang Sipalay ang may average nga gasto kada tawo nga P808 pesos.*
[Note: Government Health Facilities Data (DOH, 2016); Flood data (DENR-MGB, 2018)]