Boluntaryo nga nagsungka sa Pontevedra Municipal Police Station kag sa talatapan ni Mayor Henry Tumlos ang isa ka anay miyembro sang rebelde nga grupo nga Communist Terrorist Group (CTG).
Sa interview sang Brigada News FM Roxas City kay Police Colonel Jerome Afuyog Jr., Provincial Director sang Capiz Police Provincial Office (CPPO), iya ginpahayag nga ginkilala ang nagsungka kay alyas “June” nga isa anay ka aktibo nga miyembro sang NPA nga naga-operate sa Tarlac kag Zambales sadtong tuig 2009 tubtob 2013.
Dugang pa ni Afuyog, nadesisyonan si “June” nga magsungka bangud luyag na sini nga magbalik sa sabak sang gobyerno agud makapangabuhi sang hilway kaupod ang iya pamilya kag untatan na ang pagsuporta sa rebelde nga grupo.
Nahibaluan, nga si “June” ang anay squad leader sang Tesera sa idalum sang Kilusang Larangan Girilya Unit (KLGU) Tarlac/Zambales.
Kadungan sang iya pagsungka, ginsurrender man sini ang isa ka unit sang cal. 38 revolver nga may 3 ka live ammunition, 1 ka unit sang cal. 22 rifle, nga may 5 ka live ammunition. Nagpalab-ot naman sang bulig ang LGU-Pontevedra sa pagpanguna ni Mayor Henry Tumlos sa nagsungka nga CTG member agud makabulig sa iya nga pang-adlaw-adlaw nga pagkinahanglan. | Judy Ann Juare