-Reymund Titong
KABANKALAN CITY, Negros Occidental — Anom ka mga barangay sa 6th district ukon CHICKS area ang gin-deklarar sang Provincial Task Force to End Local Communist Armed Conflict (PTF-ELCAC) nga insurgency free sa diin si Governor Eugenio Jose Lacson ang chairperson.
Ang anom ka barangay ang parte lamang sa 43 tanan ka mga barangay sa bug-os nga probinsya nga gin-deklarar man nga insurgency free sang gobernador sang tinalikdan nga adlaw.
Suno sa gobernador, sa mga barangay nga anay insurgency affected ang maka baton sang P10 million pesos sang infrastructure project sa idalum sang Support to Barangay Development Program (SBDP) sang Department of Interior Local Government (DILG).
Ang anom ka barangay sa CHICKS nga gina kabig na sa subong nga insurgency free amo ang Barangay Caningay sa banwa sang Candoni, Barangay Lumbia sa Cauayan, Barangay Bacuyangan, Talacagay kag Alim sa banwa sang Hinobaan, kag Barangay Cayhagan sa syudad sang Sipalay.
Madumduman nga ang Negros Occidental ang gin-rekomedar na nga ipaidalum sa state of stable internal peace and security (SIPS), matapos gina-alegar pagka bungkag sang lima ka larangang guerilla sang New People’s Army (NPA).*